Matiu Rātima
2024: Kua whakawhiwhia a Tākuta Matiu Rātima (Whakatōhea, Ngāti Pūkeko) o Ōtākou Whakaihu Waka ki te New Zealand Mana Tūānuku Research Leader Fellowship ki te rangahau mātauranga e pā ana ki te rapu me pēhea te tuku tautoko e aro ana ki ngā tikanga ā-ahurea mā ngā kaiako me ngā hapori hei hāpai i te paetae ākonga Māori
He kaiako reo Māori a Tākuta Rātima i Waipapa Taumata Rau me Te Wānanga Aronui o Tāmaki Makaurau, ka mutu he kaiwhakamāori ā-tuhi, ā-waha whai tohu hoki ia. I te tau 2009 i whiwhi ia i tētahi karahipi kairangi mai i a Ako Aotearoa hei whakatutuki i tōna tohu kairangi i Te Whare Wānanga o Waikato. I whakawhiwhia ia ki tētahi Fulbright-Ngā Pae o te Māramatanga Scholar Award i te tau 2016 hei mahi rangahau i Te Whare Wānanga o Hawai'i i Manoa. I te tau 2022, i roto ia i tētahi rōpū iti i whiwhi i te Metara Auaha a Te Whare Wānanga o Waitaha e whakanui ana i te whakatinanatanga o te rangahau mā te waihanga i ngā puka aratohu ahurea mā ngā kaiako i Aotearoa.
Kua whakaitia, kua aukatia hoki e ngā tikanga Pākehā me te iwi whānui te reo, ngā tikanga me te mātauranga Māori i roto i te pūnaha mātauranga. Ka āwhina ngā rangahau a Tākuta Rātima i tētahi kaupapa e whakawhānui ana i ana mahi me ā ētahi atu hei hāpai i ngā mahi whakaako i raro i ngā tikanga. Me kī, ka whakawhānuitia e ia ngā mahi ā-āria, whaitake hoki o te rangatū puka aratohu a Hikairo mā ngā kaiako me Ngā Hau e Whā mā ngā kaiako mātauranga matua. Mā te whakanoho tika i te mātauranga ki tō tātau pūnaha mātauranga, ko te whai a Tākuta Rātima he takawaenga i tētahi aronga manaaki ake, ahurea hoki mō te mātauranga i ahu mai i ngā auara matua o te whakawhanaungatanga, kotahitanga, manaakitanga, rangatiratanga me te oranga. E kī ana a Tākuta Rātima, "ka tautoko tēnei kia pai ake a Aotearoa e āhei atu ai ngā ākonga katoa ki ngā arawātea e tutuki ai ō rātau pūmanawa nohopuku, kia puāwai, ā, kia whai wāhi atu hoki ki tō rātau ao pāpori, ōhanga, tōrangapū me te ahurea o ō rātau hapori me tō rātau whenua".
Dr Matiu Rātima (Supplied)