Ko wai kei te tatau? Te hanga anō i te hangapori o te Māori o te rau tau 19
Mā te whakamahi i ngā tikanga tauanga hou, ngā tatauranga whānui o mua, me te mātauranga Māori, ka hangaia e te tohunga hangapori rongonui a Ahorangi Tahu Kukutai FRSNZ (Ngāti Tiipa, Ngāti Māhanga, Ngāti Kinohaku, Te Aupōuri), o Te Whare Wānanga o Waikato, ngā whakaahuatanga tatauranga tuatahi o ngā hapori Māori i Aotearoa i te rau tau 19
Published on 7 Whiringa-ā-rangi November 2024
Ka whakahaerehia e Tatauranga Aotearoa te Tatauranga Whānui i ia rima tau i raro i te Ture Ngā Raraunga me Ngā Tatauranga 2022. He whaitake ngā raraunga ka kohia mō te kāwanatanga, ngā iwi, ngā pakihi, me te iwi whānui hei tātari me te matapae i ngā ia pāpori, ahurea, ōhanga hoki. Ka mahi tēnei mahi tapu i raro i ngā ture me ngā whakahaere pākaha, e whakarite ana he tino kounga ngā raraunga ka whakaputaina. Engari, kīhai i pērā i ngā wā katoa.
I puta ngā āwangawanga o ngā tohunga hangapori e rangahau ana i ngā tatauranga taupori i Aotearoa mō te tika o ngā pūtake tauanga Māori i te rau tau 19. He wā hira tēnei mō te heke o te taupori Māori, ā, i kaha whakawhirinaki atu ngā rangahau mai rā anō ki ngā tatauranga tātāmi hē.
I tēnei kaupapa Marsden Arowhānui, ka whakamahia e Ahorangi Kukutai me tōna rōpū i ngā tūmomo aronga hei whakatika i ngā hapa i roto i ngā tatauranga. Mā te whakakotahi i ngā tikanga tauanga rerekē, te tātaritanga arohaehae o ngā pūkete tatauranga taketake, me ngā kitenga mai i ngā pūtake reo Māori, ka puta i a rātau tētahi whakaaturanga tika ake o te hapori Māori o te rau tau 19. Ka tukuna ā rātau tikanga hou, kitenga hoki ki ētahi atu kairangahau, ngā hapū me ngā iwi mā ngā wānanga me te hanga i tētahi pūmanawa rorohiko māmā te whakamahi, tuwhera hoki.
He kōrero mīharo te hītori o te hangapori Māori e pā ana ki te tū pakari ngātahi – o te puta i Te Korokoro o Te Parata mai i te takiwā o te 40,000 i te tau 1896 ki te takiwā o te kotahi miriona te nui o te Māori i te tatauranga whānui i te tau 2023. He mea hira ngā mōhiohio ka kohia mai i tēnei rangahau kia mārama ai mātau ki te heke o te taupori o te iwi taketake i muri i te taenga mai o tauiwi, ā, he pēhea te pānga o ngā āhuatanga o mua ki ngā āhuatanga onāianei. Ka taea pea te whakamahi i tēnei tikanga hou i te ao katoa ki ētahi atu whenua hei titiro whakamuri, me te whakarite mai ināianei haere ake nei, ka tatauhia te katoa.
Ahorangi Kukutai with members of her hapū Ngāti Tiipa and project team members Heeni Kani and Ella Newbold (photo supplied)