Te Pōkai i te Panuku Tangata Tōhaunui: Ngā Tāngata Moana i muri i te KOWHEORI-19
I hua ake i te KOWHEORI-19 te “Tairaru Huri Tira’ i mau ai te 400,000 neke atu tāngata moana ki ngā kaipuke me ngā pōta nā te katinga o ngā paenoho. Ka tūhura a Dr Maria Borovnik, nō Te Kunenga ki Pūrehuroa, i ngā pānga ā-pāpori, ā-ōhanga anō hoki o tēnei tairaru kāore i te arohia nuitia. Ka āta tirohia te mana o ngā tāngata moana hei kaituku i te tauhokohoko ā-ao
Published on 2 Whiringa-ā-rangi November 2023
Iwa tekau ōrau o ngā mahi tauhokohoko i te ao ka mahia mā te moana. I te pupūnga ake o KOWHEORI-19, i mau ngā tāngata moana e kawe ana i ēnei rawa ki ngā kaipuke, ki ngā pōta rerekē rānei. Ka noho mahue i ō rātou whānau, he tau nei te roa i ētahi wā.
He nui ngā tāngata moana i ahu mai i te Tai Tonga o te Ao, tae ana ki Te Moana Nui a Kiwa, i ngā porihanga e poipoi ana i ngā uaratanga ā-ahurea pakari o te mahi tahi. Waihoki, ko ngā taiao kaipuke ka whakanui i te wairua mahi tahi, e whai ai ia tāngata i tētahi mahi mārakerake e whirinaki ai te waka me te tira. E whakapono ana a Dr Borovnik nā konei i whai mārohirohi ai te huhua tāngata moana i te wā o te taumaha. E kitea ana i tā rātou tiratanga tā rātou whakamātāmua i te wātea ā-takitini i roto i ngā hononga ā-pāpori, ka mātāmuri ko ngā herekoretanga a te takitahi.
Kua whakawhiwhia a Dr Borovnik rātou ko tana tīma, tae ana ki a Dr Charlotte Bedford nō te Whare Wānanga ā-Motu o Ahitereiria, ki tētahi takuhe Standard nā Te Pūtea Rangahau a Marsden ki te tūhura i tēnei ariā mā te toro atu ki ngā tāngata moana me ō rātou whatunga tautoko me te tuhi i ā rātou kōrero e pā ana ki te mate urutā o te KOWHEORI-19, ō rātou nohonga ināianei me te anamata. Ka uru atu ki tēnei rangahau wāhi-maha ko ngā tāngata takenga kanorau i Kiripati, i Tuwaru, i Whīti, i Ahitereiria, me Aotearoa. E āta aro ana ki ngā tāngata moana nō Kiripati (i noho mahue i ō rātou whānau mō te rua ki te toru tau nā te katinga o ngā paenoho). I runga i tana kite i te hiranga o te mōhiotanga pakari ki ngā tangongitanga o te ahurea o Kiripati, kua whakatōpūhia e Dr Borovnik tētahi Tīma Kaitohutohu I-Kiripati. I runga i te mahi tahi ki ngā hoa rangahau o ia takiwā, ka whai ia i te rautaki rangahau o ‘te maroro’, arā, he matapakitanga tau, ōpaki anō hoki.
I tino whakararu te Tairaru Huri Tira o KOWHEORI-19 i te tauhokohoko ā-ao, ā, e rangona tonutia ana ōna pānga i ngā whakararutanga me ngā takaroatanga ināianei. Kei te iho o taua tairaru ko ngā tāngata moana tonu, ko tō rātou manawhiri rautaki i ētahi horopaki kāore nei e mihia. Me rongo ā rātou kōrero.
Dr Maria Borovnik (photo: supplied)