Tā te raima mahu i a ia anō tūhono i ngā mātauranga tuauki o Rōmana me te ao Māori

Published on 2 Whiringa-ā-rangi November 2023

Me whakaheke te tukuwaro i te ao mā te 45% i mua i te 2030 hei kaupare i ngā pānga āhuarangi nui. Nā te hanganga o te Raima Pōtarana Noa (OPC), tētahi wāhanga matua o te raima, te 5-8% o te tukunga haurehu kati mahana. He iti noa atu te tapuwae waro o te raima Rōmana Tuauri, kua hangaia i te raima me te tuakirikiri rangitoto pēnei i te pungapunga. Waihoki, he āhuatanga ōna hei mahu i a ia anō (hei tauira, ka piri kuhutahi anō ngā piere iti). Nā reira ka whai hua, ka toitū hoki pea ngā raima hou kua hangaia i ngā rawa ōrite hei kāinga rua mō ngā raima kua hangaia i te OPC.

Kua whakawhiwhia a Dr del Rey Castillo ki tētahi takuhe Fast-Start nā Te Pūtea Rangahau a Marsden ki te whakawhanake i tētahi raima arokē e whakamahi ana i ngā rawa e nui ana i Aotearoa - te pungarehu rangitoto (pungapunga) me ngā anga kaimoana. He nui ngā whakamahinga o ngā rawa nei e ngāi Māori i roto i te wā, engari kāore i āta whakamātauria mō te hanga raima. Ka tūhura a Dr del Rey Castillo rātou ko tana tīma i ngā āhuatanga rawa motuhake o te pungapunga i tō rātou rohe o Te Arawa me te paura anga moana nō ngā pāmu wai o Ngātiwai. Kātahi ka whakatau i te hāngai rānei hei whakakapinga wāhanga raima. Kātahi rātou ka tūhura mēnā e whakaatu ana ngā raima kua hangaia i ēnei rawa i ngā āhuatanga “mahu i a ia anō” pēnei i te raima Rōmana Tuauri. Ka pīkauria tēnei mahere rangahau i runga i tā te mana whenua whāngai atu, te hunga e pāngia nei e te ahumahi parahanga o te hanga raima, me te hunga hoki ka whai hua i te whakamahinga toitū o ēnei rauemi māori.

Mā te tūhono i ngā mātauranga tuauki o Rōmana me te whakamahinga tika o ā tātou taonga, ka whai tēnei kaupapa ki te whakaputa i tētahi raima toitū ka whakaheke i te tukuwaro hei painga mō Aotearoa, ā, ā tua atu.