Kua kitea ahau: te whakamahi i ngā pukapuka pikitia mō te whakauka me te whakarauora reo Taketake
Ka mahi tahi a Ahorangi Nicola Daly nō Te Whare Wānanga o Waikato ki tētahi tīma rangahau me te whare whai tohu nei, ki a Huia Publishers, ki te toro i ngā ara e whakaatuhia motuhengahia ai ngā reo Taketake i ngā pukapuka pikitia
Published on 2 Whiringa-ā-rangi November 2023
He mana mātātuhi nui tō ngā pukapuka pikitia tamariki. He pou whanake mō ngā tamariki, e whakatairanga ana i te kapohanga o te reo, waihoki te tuakiritanga. Engari ka pēhea rā tēnei whakaawenga? Ka pēhea tā ngā kaiwhakaputa whakamahi i ngā āhuatanga ataata, pēnei i ngā pikitia whakaari, te momotuhi, ngā tae, me te whakatakotoranga hei whakairo i te tūoho o ngā tamariki ki te ao hurihuri? Ka mutu, ka pēhea tā ngā pukapuka pikitia whakakanohi i ngā matatini o ngā reo Taketake, o ngā mātauranga me te tuakiritanga?
I whakawhiwhia a Ahorangi Daly ki tētahi takuhe Standard nā Te Pūtea Rangahau a Marsden ki te tuhi me te toro i ngā ara e whakakanohihia motuhengahia ai ngā reo Taketake i Aotearoa. Ka pīkauria tahitia tēnei rangahau me te kamupene whakaputa Māori, whai-tohu-maha nei, me Huia Publishers. E ai ki te Tumu Whakarae o Huia Publishers, ki a Eboni Waitere, e hiamo ana rātou ki te mahi tahi ki te tīma rangahau.
He aronga kaupapamaha, ā, he mea āki e ngā mātāpono kaupapa Māori, e whai ana tēnei kaupapa whakamīharo ki te wero i ō tātou whakaaro e pā ana ki te whakaputanga o ngā pukapuka pikitia. Ka āta aro te tīma e kī ana i te Māori me te Pākehā ki ngā taukumekumetanga i te wāhi ki ngā whakamāoritanga, ki te whakaputanga ataata o te Taketaketanga e tika ana, me tā ngā pukapuka pikitia whakauka me te poipoi i ngā reo Taketake.