Kia rite! Te kapa haka mō te Pouaka Whakaata
Ka tūhura a Tākuta Jani Wilson (Ngāti Awa, Ngā Puhi me Mātaatua) o Te Kunenga Ki Pūrehuroa i ngā tūmomo urutaunga ki te kapa maha hei urupare ki te whanaketanga hangarau me te tātari kei hea tēnei āhuatanga ināianei
Published on 3 Whiringa-ā-rangi November 2022
He wāhanga hira te kapa haka o te ao Māori, e whakamahia ana i roto i ngā tikanga hei whakangahau, whakakotahi me te whakawhiti mōhiotanga. Ka ara ake i tēnei ko tētahi tirohanga Māori mō ngā take puta noa i tō tātau wā, me te whai wāhi ki ngā kōrerorero werowero, hitori, tōrangapū, ā-whatumanawa hoki. E whāngai, e whakawhanake, me te whakamana te kapa haka onāianei me te whakanui i te ao Māori, te reo rangatira me ngā aronga ngātahi ki te mahi tahi i raro i te kaupapa Māori.
kapa haka. Image: supplied
I te rau tau kua hipa, i tino tere te rerekē haere o te kapa haka, otirā nā te kauneke o ngā hangarau mata. Engari he iti noa ngā rangahau e hōpara ana i te Māori me te whakaputa whakaaturanga. He ahurei te kaupapa Tahua Marsden, e arahina ana e Tākuta Jani Wilson. Koinei te mea tuatahi ki te pōhiri i ngā kaihaka me ngā kaitito ki te kawe i ō rātau mōhio hōhonu ki te ao kapa haka ki te rangahau mātauranga, e tūhono ana i te ariā ki te mahi. Ka tātari a Tākuta Wilson i ngā huringa nui puta noa i te hitori hangarau hopu whitiāhua, e puta ai tētahi tirohanga whānui tuku iho o ngā whakaaturanga kapa haka kua whakaahuatia i runga pikitia. Arā, mai i ngā whakaaturanga o mua rā anō me kī i hopukia hei whakaatu 'i ngā mahi a te Māori' i roto i tēnei wāhanga o te emepaea, tae noa ki ngā whakaaturanga kapa haka onāianei mā te hunga mātakitaki. Ka whakahaerehia anō e rātau tētahi rangahau reanga-mahakaimātakitaki mā tētahi āhuatanga hou ake o Rōpū Whānau – he tikanga rangahau rōpū arotahi i whakatūria e Wilson – e urupare ana ngā whanaunga tino tata ki ngā whakaaturanga kapa haka.
He pānga o te whakaahua me te whakaatu kapa haka ki ngā piki me ngā heke o tēnei momo toi, ngā tukituki i waenga i te pupuri i te tikanga me te tirotiro i ngā auahatanga. Ka tuwhera tēnei kaupapa ki ngā kaihaka me ngā kaitito me ō rātau whakatūtū me ngā pūkenga rangahau huhua ki te akoranga mātauranga. Ka takawaenga tēnei kaupapa i ngā wāhi mō te Māori ki te āta whiriwhiri i te anamata ka taea mō te kapa haka i roto i tēnei ao hurihuri.