He tikanga hou mō te rangahau i te porohau i ngā taupori Māori me Te Moananui-a-Kiwa
Ka hangaia e Ahorangi Tuarua Alex Gavryushkin mai i Te Whare Wānanga o Waitaha, me Ahorangi Michael Witbrock mai i Waipapa Taumata Rau tētahi utauta rorohiko rerekē mō te ako i ngā rerekētanga ā-ira e pā ana ki te pūtake o te porohau
Published on 3 Whiringa-ā-rangi November 2021
He momo kaikōiwi kakātanga mamae te porohau e tino nui rawa te pā ki ngā taupori Māori me Te Moananui-a-Kiwa. Ka pupū ake ina tipu ngā tioata uriki i roto i ngā hono, ā, ka pā mai mēnā he nui te uriki i roto i te toto. Nā ngā rerekētanga iranga i waenga i te tangata ka pā mai ngā rerekētanga ki te nui o te uriki, e whai pānga ana ki te tūpono pā mai o te porohau ki ia tangata. Mā te matapae i te nui o ngā uriki mai i te hanganga ira o te tangata ko te mutunga atu ka pai ake ngā putanga hauora mō te hunga e pāngia ana e te porohau. I whakamahia e ngā kairangahau i rangahau i tēnei raruraru i mua tētahi tikanga tatauranga tino kaha e kīia ana ko te rangahau huingaira-whānui hāngai. Engari, ka matapaetia te whāititanga ō tēnei tikanga e tino whakamahia ana.
Ahorangi Tuarua Alex Gavryushkin
He auahatanga o nā tata nei ngā tauira kōtuinga io hōhonu ā-aronga i tutuki te whakamahi mō ētahi o ngā raruraru uaua rawa o te koiora rorohiko (hei tauira, te āhukahuka atahanga me te matapae i te hanganga pūmua). I tēnei takuhe Tahua Marsden Arowhānui, ka whakaritea e Ahorangi Tuarua Gavryushkin rāua ko Ahorangi Witbrock tētahi rōpū kei roto ko Tākuta Megan Leask (Kāi Tahu, Kāti Mamoe), Tākuta Karaitiana Taiuru (Ngāti Tahu, Ngāti Kahungunu, Ngāti Toa), me Ahorangi Tony Merriman ki te waihanga i kaupapa ā-aronga ki ngā rangahau huingaira-whānui hāngai. Kātahi anō te momo kaupapa pēnei ka hōpara i te wāhanga o ngā tauwhitiwhiti iranga ki te mate. Ka whakangungu te utauta hou me tētahi huingararaunga porohau nui mai i Piritana Nui, ka tāpirihia ki te taha o ngā raraunga mai i ngā tāngata Māori me Te Moananui-a-Kiwa tokoiti ake. Ka hangaia ngā tikanga hei whakakore i ngā whakaaro tītaha kei ngā raraunga, ā, i te mea ko ngā raranga ira he whakapapa, ko ngā tikanga ka ārahi i te mahi a te rōpū. Ka tino whai wāhi mai ngā whānau, ngā hapū me ngā iwi i roto i te whakamāoritanga o ngā raraunga.
Ka tautoko te kaupapa i te whāinga pae tawhiti o te waihanga i te utauta hāngai whānui ka taea te whakamahi mō ngā mate maha rerekē. Mā te whakamōhio haere i te whakamaimoatanga me ngā tātari mō te Māori me Te Moananui-a-Kiwa e pā ana ki te porohau, ka tautoko te rangahau a te rōpū i te whai wāhi ōrite ki ngā ratonga ira.