Te whakapai ake i te whakatau i ngā mate whēkau

Published on 7 November 2019  

He uaua pea te whakatau i ngā mate whēkau kino, pērā i te mate whēkau nui, mate pukupuku ki te kōpiro me te mate piro me te whakamaimoa tōtika. Ko ngā tikanga onāianei mō te kimi i ēnei mate ko te whakaahua i te kiri roma whēkau mā ngā whakaahua arotahi rō-tinana me te tiki ōkiko hei aromatawai. Me whakamārama ēnei tikanga e ngā rata mātanga, ka mutu he roa te wā, ā, he nui te utu. Kei reira anō te tūponotanga mō ngā whakataunga hē. Me whiwhi ngā rata i tētahi utauta tautuhi e tōtika ai te kimi me te wehe i ngā huringa ōkiko whēkau me te tuku whakatau wāhi manaaki mō tētahi ara tere ake ki ngā whakamaimoa tika.

Kua whakawhiwhia a Tākuta Miller ki tētahi takuhe Tīmata Wawe mai i te Pūtea Rangahau a Marsden hei waihanga i tētahi utauta whakatau hou mō te mate whēkau mā te Raman spectroscopy. Ko te Raman spectroscopy, mai i te hihinga tūrama, he utauta ōmata ka taea te whakamahi kia tere ai te tātari i ngā ōkiko tinana. Ahakoa kua whakaaturia tōna pūmanawa mō te kimi i te mate pukupuku, kāore i te tino hāngai, whāiti rānei ngā tikanga o te Raman spectroscopy hei whakakore atu i te hiahia mō te tiki ōkiko hei aromatawai. Ko te whāinga o Tākuta Miller me tōna rōpū he whakapai ake i te tika o tēnei whakatau mā te tāpiri i ngā tikanga spectroscopic tautoko. Ka hangaia e rātau tētahi weronga weu spectroscopic maha me te whakamātautau i ētahi tāngata e pāngia ana e te mate piro. Ka hangaia ngā tauira akoranga mīhini tino hou rawa mō te wehewehe me te whakatau i ngā ōkiko pai me ngā mea tino rerekē.

Ka taea e te weronga a Tākuta Miller te matawai ngā wāhi nui o te ōkiko me te urupare inamata hei tuku whakatau i te wāhi manaaki, te tautuhi rānei i ngā wāhi rānei mō te tiki ōkiko hei aromatawai. Kei tana rangahau te kaha ki te whakaputa i ngā painga pai ake me te whakamaimoa tere ake i te hunga e pāngia ana e ngā mate whēkau kino.