Te raruraru o tētahi manawa reka
Kei te tūhura a Tākuta Kimberley Mellor o Te Whare Wānanga o Tāmaki Makaurau i ngā pānga o te whakaputu kūhukahuka ki te hauora o ngā manawa o ngā tūroro matehuka momo 2
Published on 7 November 2019
Kei te piki haere te tukipū o te mate manawa, nā ngā mate whakarau pūngao pērā i te matehuka momo 2, puta noa i te ao. Ko te whakatōpū kūhukahuka tētahi āhuatanga e taea ai ngā momo ōkiko te whakaputu putunga huka kūhuka. I raro i ngā āhuatanga pēhi, pērā i te kore kai me te matehuka, ka whakaputu kūhukahuka anō te manawa, ahakoa ko ngā mōmona kē, kaua ngā huka, te pūtake matua o te pūngao mō ngā pūtau manawa. E kitea noatia ana te whakatōpū kūhukahuka i ngā āhuatanga mate manawa maha rerekē engari ko ngā āhuatanga kōkiri i tēnei whakatōpūtanga kāore i te tino mōhiotia. Ina, ko ngā mutunga iho o ēnei kūhukahuka nui rawa mō te ora o ngā manawa o ngā tūroro kāore i te mōhiotia.
Dr Mellor in the lab. Photo: supplied
Kua whakawhiwhia a Tākuta Mellor ki te takuhe mai i Te Pūtea Rangahau a Marsden ki te tirotiro mēnā ko te whakatōpūtanga o te kūhukahuka i roto i ngā manawa o ngā tūroro mate whakarau pūngao he pūtake, he pānga rānei ki te mate manawa hāngai. I whakaahuatia e Tākuta Mellor rātau ko tōna rōpū tētahi ara tukatuka kūhukahuka tē mōhiotia i roto i te manawa, ā, he kaiwhakahaere hira tēnei i ngā rahinga kūhukahuka i roto i ngā manawa hauora, mate hoki. Ko te whāinga o tā rātau rangahau hou he kauneke whakamua i ngā mōhiotanga o ngā koiora taketake o te whakahaere kūhukahuka i roto i te manawa. Ko te whāinga kia tukuna ngā whakaaturanga tuatahi ko ngā whakatōpū kūhukahuka i rō pūtau te kaikōkiri i te hē o te manawa i roto i te mate manawa-whakarau pūngao.
Nā te tukipū nui o ngā mate whakarau pūngao me te mate manawa i Aotearoa, ka mutu e tino pākia ana ko te iwi Māori me Te Moananui-a-Kiwa, he tino whānui ngā painga pūmau o ēnei mōhio ki ngā āhuatanga hauora, ōhanga hoki.