Te whakaora i te kauri mā tētahi āhuatanga tūhura rongoā ā-tangata
Ka whakamahia e Ahorangi Michelle Glass o Te Whare Wānanga o Otāgo tētahi āhuatanga tūhura rongoā ā-tangata hei āwhina ki te poke i te tahumaero dieback i roto i te kauri, tētahi momo tino hira o Aotearoa.
Published 8 November 2018
Ko te kauri tētahi o ngā momo tino hira o Aotearoa. Engari, kei te pokea ēnei rākau e te kauri dieback, he tahumaero rongoā-kore i ahu mai i tētahi tukumate ā-kōpurawhetū te kauri dieback, Phytophthora agathidicida. Kāore i te eke ngā whakapau kaha ki te aukati i te hōrapa o tēnei tahumaero whakamate ki Aotearoa. Ka uru ngā pata pūtake o te kauri dieback, i ahu mai i ngā mahi a te tangata, i roto i ngā oneone kī i te wai kia piri ki ngā pakiaka o ngā kauri, ā, ka tīmata te poke. Kei roto i ngā tikanga rāpoi ngota e whakahaere ana i tēnei nekehanga me te tahumaero ko tētahi rōpū ake o ngā pūmua urupare kei te mata o ngā pata. Kei roto ēnei momo pūmua i te nuinga o ngā momo paturopi-kore, mai i te tukumate kauri dieback tae atu ki te tāngata, ā, ka takawaenga i ngā tukanga ōkiko hira katoa i roto i ngā pūtau. Tata ki te 30% te arotahi atu a ngā rongoā ā-tangata katoa onāianei.
Kua whakawhiwhia a Ahorangi Michelle Glass o Te Whare Wānanga o Otāgo me tōna rōpū ā-ao peka mātauranga maha ki tētahi takuhe Pūtea a Marsden hei whakatūtaki i te raruraru o te kauri dieback mā te whakamahi i tētahi āhuatanga auaha e whai ana i te tauira mō te tūhura rongoā a te tangata. Ka rangahau a Ahorangi Glass i te mahi a ēnei pūmua tauwhāiti i roto i te hekenga, me whakapoke mai i ngā pata tuku kauri dieback. Ka tautuhia e ia ngā pūhui e taea ana te whakawhitiwhiti me ēnei pūmua me te tāmi atu. Kātahi ka hangaia e ia ngā tauira hei rangahau i te tauwhitiwhiti i waenga i ēnei pūhui me ngā pūmua.
Mā tēnei kaupapa ka taea ngā whakamaimoatanga rerekē te mahi e taea ai te tukituki atu ki tēnei tahumaero dieback kino rawa me te tiaki i te kauri o Aotearoa.