Kua piki te maha o ngā kaupapa kua whiwhi pūtea, tautoko hoki mō ngā kairangahau hou mai i te tahua pūtea a Marsden 2016

E $65.2 miriona te pūtea (GST kore) i tohaina e te Tahua Marsden ki ngā kaupapa rangahau 117 i  tēnei tau, e tautoko ana i ngā rangahau a ngā kaitūhura pai rawa o Aotearoa i roto i ngā wāhanga o te pūtaiao, pūkahatanga, pangarau, mātauranga ā-iwi me te tikanga tangata.

He pikitanga o te $54 miriona (GST kore) tēnei i whakawhiwhia ki ngā kaupapa 92 i tērā tau, nā te whakapikitanga o te $66 miriona (GST kore) i roto i te whā tau i te whakaputaina e te Kāwanatanga i te Tahua 2016.

Ka tohaina ngā takuhe i roto i ngā tau e toru, hei utu i ngā utu ā-tau, ngā ākonga me ngā tūranga kairangi, ngā whakapaunga whakahaere me ngā taputapu rangahau.

He kaha ngā tautoko mō ngā kairangahau hou i tēnei tau, e 49 ngā takuhe Fast Start i tohua, ā, e 29 i tohua i tērā tau, te kī a te TIamana o te Kaunihera Pūtea Marsden a Ahorangi Juliet Gerrard FRSNZ.

“He mea waihanga ngā takuhe Fast Start kia taea e ngā kairangahau hou te whakatū ō rātau wāhanga motuhake me te whakarite ka anga whakamua ngā rangahau a ēnei tāngata.

“I tino mīharo ngā rōpū whiriwhiri ki te kounga o ngā tono Fast Start i tēnei tau nō reira kei te whakamahia e mātau ngā pūtea tāpiri kia nui atu ngā kaupapa e tautokohia ana e mātau.”

He maha ngā kairangahau Fast Start kei te tirotiro i ngā take kei mua tonu i te aroaro o te iwi whānui i tēnei wā tonu, pēnei i te huri o te āhuarangi, ngā pokenga hauota, te hekenga me ngā tipu me ngā kararehe tūturu o Aotearoa.

Kua piki te maha o ngā takuhe ki ngā kairangahau pūmau mai i te 63 i tērā tau ki te 68 i te tau 2016, nā te pikitanga o ngā pūtea. He whānui ngā kaupapa e tūhurahia ana e rātau i whiwhi takuhe Aro Whānui, ā, he whai pānga nui ēnei ki a Aotearoa pēnei i ngā horo pūtumu, ngā kōtuinga ā-iwi Māori o nehe me te āhua o te mahi a te melanin hei ārai tīkākā.

Hei tā Ahorangi Gerrard he haumi wā roa te Tahua Marsden ki Aotearoa. “Mā te tautoko i ngā kairangahau mātau rawa o Aotearoa ki te kōkiri i ō rātau whakaaro rawe rawa, tae atu ki ngā mōhiotanga o ngā whakanekeneke o te āhua o ngā mahi i te taumata taketake, ka āwhina te Tahua Marsden ki te waihanga i te tūāpapa rangahau kaha mō Aotearoa, e whai hua ai tātau āpōpō. Nā te momoho o ngā kairangahau manu hou i tēnei tau ka tau ō mātau whakaaro mō te pakari o tō tātau anamata a muri ake.”

E whakahaerehia ana te Tahua Pūtea e Te Apārangi mā te kāwanatanga.